تتذكروا علي الله !!!

تتذكروا (على الله ) ؟ طبعاً رؤوساء التحرير بعرفوا الإسم ده كويس ده إيميل كان بتجي فيهو الأخبار الضاربة من جهاز أمن البشير وقتها وكان الخبر بنزل الزامي في الصحف ومرات كمان يطلب منك تعملوا ( مانشيت) عدييييل

أها القصة عندها علاقة بخبرالانتباهة اليوم أو قل أخبار الانتباهة خلال كم اسبوع كده ابتداء من خبر الشركة البتصدر اللحوم وتبيع كيلو اللحم بخمس جنيه ومروراً بخبر خلية داعش – القديم – طبعاً لانو الخلية دي دخلت من عهد النظام المباد وقبضوا منهم عناصر زمااااان واخيراً خبر سيدة الأعمال الإفريقية
طيب منو الجهة البتقيف وراء الأخبار من النوع ده؟ أكيد جهة عندها مصلحة وبتخوض معركة بقاء خاصة بعد اقتراب تكوين جهاز الأمن الداخلي …. ودي طبعاً قصة براااااها.
عارفين جهاز الأمن الداخلي المعرقل قيامه منو بوريكم في وقت تاني كدي خلونا في الأخبار الغريبة دي
اها تاني في حاجة مهمة جداً هل فعلاً في سيدة أعمال أفريقية دخلت السودان نفترض إنها دخلت فعلاً تفتكروا الجابها منو ومنو الوراها وطالما في جهات أمنية عندها خبر وتفاصيل الزولة دي ليه ما قبضت عليها
ولا عايزين توصلوا للشعب السوداني انو الدعارة في عهد الحكومة الانتقالية بقت ما جريمة وانو الاتجار بالجنس بقى مباح
لا لا طبعاً ارجعوا للقانون الجنائي لسنة ١٩٩١ المادة ١٥٤ القصة دي مجرمة بالمادة دي اي مجرمة ومنصوص عليها وعندها عقوبة كمان .
طيب كدي نشوف بعد الثورة اختفى الإيميل بتاع (على الله) والناس دي بقت شغالة تسريب ساكت كده تحت حاجة اسمها (مصادر عليمة وموثوقة وانو شنو كده ما عارف ) ودي أضعف أنواع الأخبار وساهل جداً يتم نفيها
لكن الحصل في خبر اليوم ده غريب شوية بعد نزل الصباح بدري في مواقع الكترونية لفتح ونقلت عن الانتباهة ونشرت الخبر على نطاق واسع ما يعني انو الحملة دي منظمة تنظيم دقيق جداً